دیمەنی پاککردنەوەی یەکێک لە قەنتەرەکانی سنووری قەزای تەقتەق ... وێنە؛ شارەوانی تەقتەق.
قه‌نته‌ره‌كه‌ى ده‌روازه‌ش ده‌كرێته دووساید
قه‌نته‌ره و رێڕه‌وه باراناوییه‌كانى چوارده‌ورى ته‌قته‌ق پاككرانه‌وه
964+
فه‌رهاد حه‌سه‌ن
له قه‌زاى ته‌قته‌ق، چه‌ند رۆژێكه تیمه‌كانى شاره‌وانى خه‌ریكی خاوێنكردنه‌وه‌ى قه‌نته‌ره و رێڕه‌وه باراناویه‌كانن، بۆئه‌وه‌ى له ئه‌گه‌رى باران بارینێكی زۆر مه‌ترسی دروستبوونى لافاو له ئارادا نه‌بێت، سه‌رۆكى شاره‌وانیش ده‌ڵێت، قه‌نته‌ره‌كه‌ى ده‌روازه‌ى قه‌زاش ده‌كرێته دووساید.
پاككردنه‌وه‌ى ئه‌م شوێنانه لەسەر راسپاردەی بەڕێوەبەرایه‌تی گشتی شارەوانییەکانی هەولێر بووه و بۆ کەمکردنەوەی مه‌ترسی لافاو لەسەر قەزاكه.
نه‌مر نیازى كاكه‌ڕه‌ش، سه‌رۆكى شاره‌وانى ته‌قته‌ق به 964ـى راگه‌یاند له چوارده‌ورى سه‌نته‌رى قه‌زا 13 قه‌نته‌ره‌ى گه‌وره هه‌ن و له‌لایه‌ن تیمه‌كانیانه‌وه به ئامێری حه‌فاره و ئامێرى دیكه، هه‌موویان پاككراوه‌نه‌ته‌وه.
وتیشی “پاشماوه‌ى بارانى پارساڵ هه‌موو قه‌نته‌ره‌كانى به زبڵ و پاشماوه‌كان گرتبوو و مه‌ترسییه‌كى زۆرى دروستكردبوو بۆ دروستبوونى لافاو”.
ئاماژه‌ى به‌وه‌شكرد، ته‌نیا له ساڵى 2021 لافاو له ته‌قته‌ق دروسبووه، ئه‌ویش به‌هۆى ئه‌وه‌ى قه‌نته‌ره و رێڕه‌وه‌كانى ئاو پاكنه‌كرابوونه‌وه، به‌ڵام ماوه‌ى سێ ساڵه هیچ جۆره لافاوێك له سنووره‌كه‌یان دروست نه‌بووه.
روونیشیكرده‌وه پاككردنه‌وه‌ى ئه‌م شوێنانه وه‌ك پلانێكی به‌رده‌وامه و له‌وه‌ته‌ى ساڵى 2022 ـه‌وه به‌به‌رده‌وامى پاكده‌كرێنه‌وه.
باسی له‌وه‌شكرد، پلانێك هه‌یه كه ئه‌و قه‌نته‌ره‌یه‌ى له ده‌روازه‌ى ته‌قته‌ق دروستكراوه شه‌قامه‌كه‌ى سه‌رى بكرێته دووساید به‌مه‌ش قه‌نته‌ره‌كه له‌وه‌ى ئێستا هه‌یه گه‌وره‌تر و فراوانتر ده‌بێت و ده‌بێته هاوكارێكی باشیش بۆ كۆنه‌بوونه‌وه‌ى ئاو له ده‌روازه‌كه.
