دوای 10 ساڵ
خوێندنگایەکی 18 پۆلی نوێ رادەستی پەروەردەی شارەزوور کرا
964+
بڕوا مەجید_ شارەزوور
خوێندنگایەکی 18 پۆلی نوێ رادەستی پەروەردەی شارەزوور کرا و کێشە دووری خوێندنگا بۆ چەند گەڕەکێک چارەسەر دەکات.
قوتابخانەکە دەکەوێتە گەڕەکی زەمەقیەکان لەقەزای شارەزوور، بۆ ئەمساڵ خوێندنی تێدادەکرێت و پەروەردەی شارەزوور بە پلانی خۆی مامۆستا و پێداویستەکانی تری بۆ دابین دەکات
نەبیل حەمەساڵح، بەڕێوەبەری پەروەردەی شارەزوور، بە 964ـی راگەیاند، لە ساڵی 2014وە لە سنوری قەزای شارەزوور سێ قوتابخانە هەیە کە کارکردن تێیاندا راگیراوە، دوانیان بەڕێژەی %60 و %70 کارەکانیان تەواوبووە و دانەکەی دیکەیان کە ئەمڕۆ رادەست کراوە رێژەی %94ی کارەکانی تەواوببوو.
ئەو بەڵێندەرەی کە قوتابخانە 18 پۆلیەکەی دروستکردووە کێشەی پێنەدانی قەرزی هەبووە، ئەو کێشەیەی بۆ چارەسەر کراوە و قوتابخانەکەی تەواوکردووە.
نەبیل حەمەساڵح، وتیشی، رووبەری بینای قوتابخانەکە هەشت هەزار مەترە و بە شێوەیەکی مۆدێرن دروستکراوە، کارئاسانیەکی زۆر بۆ قوتابیانی ئەم گەڕەکانەی نزیکی خۆی دەکات و رێگای دووریان بۆنزیک دەبێتەوە.
“ئەگەر پێشتر چووبن بۆ خوێندنگایەکی دوور خەمی منداڵەکانیان بوبوێت چیتر دوورنابن و لەنزیک ماڵی خۆیان دەخوێنن، بەشێک لە کاری بچوک و کارگێڕیەکانی ماوە لەهەفتەی ئایندە بەتەواوی بەڕوی قوتابیاندا دەکرێتەوە”، نەبیل حەمە ساڵح وای وت.
پێداچوونەوە: هاوبەش
