ناسنامەى یەکێکیان ئاشکرا بوو
تەرمى ئەو کەسانەى لە بۆردومانەکەدا گیانیان لەدەست دا گەیشتوونەتە پزیشکى دادى سلێمانى
964+
دیلان محەمەد
تەرمى ئەو سێ کەسەى لە بۆردومانى فڕۆکە بێفڕۆکەوانەکەى شارباژێر گیانیان لەدەست دا، گەیشتوونەتە پزیشکى دادى، یەکێک لەو کەسانە تاقانەى چوار خوشک و باوکى حەوت منداڵە
بە وتەى عوسمان شارباژێری قائیمقامی چوارتا کە بۆ 964 قسەى کردووە، ئۆتۆمبێلێکى پیکاب لە کاتژمێر 1:40 خولەک لە گوندی هەرمێلەی ناحیەی زەلان کراوەتە ئامانج و سێ کەس تێیاندا گیانیان لەدەست داوە.
بە وتەى عوسمان شارباژێرى، شۆفێرەکەی دانیشتووى گوندى چەمەکە، کەسوکارەکەشى بۆ پەیامنێرى 964 قسەیان کردووە کە تاقانەى چوار خوشک و باوکى حەوت منداڵە.
لە رووداوەکەدا، منداڵێکیش کە کانۆلاى لەدەست بووە گیانى لەدەست داوە و کەسى سێیەمیش بەهۆى زۆرى رێژەى سووتانەکەیەوە نەناسراوەتەوە.
ئێستا تەرمى هەرسێ کەسەکە لە پزیشکى دادن و توێکاریان بۆ دەکرێت و دواى ناسینەوە رادەستى کەسوکاریان دەکرێنەوە.
پێداچوونەوە: وریا فەتاح
