دوو دیمهن لهكاتى سه‌ردانى لیژنهى مافى مرۆڤى كۆیه بۆ بنكه‌ى راگیراوان... وێنه: دهستهى مافى مرۆڤ
ورده گله‌ییان هه‌یه به‌ڵام بیناكه‌یان وێرانه
مافى مرۆڤى كۆیه به‌دواداچوون بۆ كێشه‌و گرفتى راگیراوانى سنووره‌كه‌ى ده‌كات
964+
فه‌رهاد حه‌سه‌ن
نوسینگه‌ى مافى مرۆڤ له كۆیه زوو زوو سه‌ردانى بنکەی پۆلیسی گرتن و گواستنەوەی کۆیە ده‌كات و به‌دواداچوون بۆ كێشه‌و گرفته‌كانیان ده‌كات، ئه‌وه‌ى تێبینیان كردووه ئه‌وه‌یه زۆرجاران راگیراوه‌كان ورده گله‌ییان له ئیداره هه‌یه، به‌ڵام ده‌ڵێن، كێشه‌ى گه‌وره‌یان بینكه‌یانه و پێویستیان به بینایه‌كى نوێ هه‌یه.
له‌ناو بنكه‌كه‌دا سندوقێكیان هه‌ڵواسیوه بۆئه‌وه‌ى هه‌ر راگیراوێك داواكارى، ره‌خنه، پێشنیار و گله‌ییان هه‌بێت به‌نامه بیخه‌نه ناو سندوقه‌كه‌وه.
سه‌نگه‌ر عوسمان، به‌ڕێوه‌به‌رى نوسینگه‌ى مافى مرۆڤ له كۆیه به 964ـى راگه‌یاند، هه‌فتانه لانیكه‌م دووجار سه‌ردانى ئه‌م بنكه‌یه ده‌كه‌ن و له بارودۆخى راگیراوان و بنكه‌كه ده‌پرسنه‌وه.
وتیشی “گله‌یی و ره‌خنه‌ى راگیراون له‌سه‌ر شتى لاوه‌كییه به‌ڵام كێشه‌ى گه‌وره‌یان بیناكه‌یانه كه زۆر كۆنه و وێرانه، پێویسته بینایه‌كى نوێیان بۆ دروست بكرێت”.
بیناكه، كه‌وتووه‌ته ناو سه‌نته‌رى قه‌زاى كۆیه و دروستكردنه‌كه‌ى بۆ ساڵانى هه‌شتاكان ده‌گه‌ڕێته‌وه.
ئاماژه‌ى به‌وه‌شكرد، راگیراوه‌كانى بنكه‌ى كۆیه ماوه‌یه‌كی دیاریكراو له پێنج رۆژه‌وه بۆ كه‌متر له شه‌ش مانگ له‌و بنكه‌یه ده‌مێننه‌وه و ئه‌وانه‌ى له‌وێن راگیراون له قۆناغى لێكۆڵینه‌وه‌دان و حوكمدراو نین.
دووپاتیشیكرده‌وه، تاوه‌كو ئێستا له‌لایه‌ن كارمه‌ندانى بنكه‌كه‌وه هیچ حاڵه‌تێكی توندوتیژى له‌به‌رامبه‌ر هیچ راگیراوێك ئه‌نجام نه‌دراوه و ده‌شڵێت، هه‌ر كه‌موكوڕی و تێبینیه‌كیشیان له بنكه‌كه به‌دی كردبێت به به‌رپرسی بنه‌كه‌یان راگه‌یاندووه.
