ئەمساڵ زیادى کردووە
638 بازرگان و بەکارهێنەرى مادەى هۆشبەر دەستگیرکراون
964+
دیلان محەمەد- سلێمانى
دەزگاى ئاسایشى هەرێم دەڵێت، بەکارهێنانى و بازرگانیکردن بە مادە هۆشبەرەکان زیادى کردووە و ئەمساڵ 638 کەس دەستگیرکراون.
ئەمڕۆ سێشەممە، سەلام عەبدولخالق، بەرپرسى راگەیاندنى دەزگاى ئاسایشى هەرێم بە 964ـى وت،”بە شێوەیەکى زانستى بڕى زیاتر لە 150 کیلۆگرام مادەى هۆشبەر لەناودەبەین کە پێشتر دەستى بەسەرداگیراوە و بڕیارى لەناوبردنى دراوە.
وەک باسى دەکات، ئەمساڵ 638 بازرگان و بەکارهێنەر و مامەڵەکارى مادەى هۆشبەر دەستگیرکراون، لەو ژمارەیە 250 تۆمەتباریان بەکارهێنەرن و ئەوانی تر بازرگان و مامەڵەکارن.
جەختیش دەکاتەوە کە بەکارهێنان و بازرگانیکردن بە مادەى هۆشبەر زیادى کردووە و چالاکییەکانى ئاسایشیش بۆ رووبەڕووبونەوەیان زیادى کردووە.
ماوەیەک لەمەوبەریش ئەنجومەنى ئاسایشى هەرێم لە راگەیەندراوێکدا، ئامارى هەشت مانگ و نیوى رابردوو 24ـى تشرینى یەکەمى 2023 تا 12ـى تەمموزى 2024ـى بڵاوکردەوە کە تێیدا لەو ماوەیەدا 952 کیلۆگرام مادەى هۆشبەر دەستیبەسەرداگیراوە بەم شێوەیە:
5 کیلۆگرام جۆرى هێرۆین
89 کیلۆگرام جۆرى حەشیش
3 کیلۆگرام جۆرى ماریجوانا
28 کیلۆگرام جۆرى تلیاک
205 کیلۆگرام جۆرى کریستاڵ
51 کیلۆگرام جۆرى کریستاڵى تێکەڵ شلەمەنى
365 کیلۆگرام جۆرى حەبى هۆشبەر لە جۆرى کاپتاگۆن کە دوو ملیۆن و 200 هەزار دەنکە
206 کیلۆگرام جۆرى حەبى جۆرى کاپتاگۆن پێچراوە بە فوم کە ملیۆنێک و 200 هەزار دەنکە
28 هەزار و 944 شیت حەبى هۆشبەر لە جۆرى ترامادۆڵ
پێداچوونەوە: وریا فەتاح
