ئاڵای عێراق و ئەمریکا دەردەکەوێت _ وێنە: باڵیۆزخانەی ئەمریکا لە عێراق
باڵیۆز ئاشکرایکرد
ئەمریکا و عێراق گفتوگۆیەکی هاوبەشی ئەمنی بەڕێوەدەبەن
964+
ئەحمەد مستەفا
ئەمڕۆ دووشەممە، باڵیۆزی ئەمریکا لە عێراق لە تۆڕی ئێکس رایگەیاند، “واشنتن و بەغدا، گفتوگۆى ئەمنى هاوبەشی نێوانیان بەڕێوە دەبەن”.
گفتوگۆکان ماوە ماوە و هەندێک رووبەر و هەندێکیش بە ئۆنڵاین بەڕێوە دەچن، پرسی سەرەکی کشانەوە و مانەوەی هێزەکانی ئەمریکایە لە عێراق.
بە گوێرەی وەزارەتی بەرگری ئەمریکا پنتاگۆن، “دوو هەزار و 500 سەربازی ئەمریکی لەناو خاکی عێراقدان”.
ئەلینا رۆمانۆسکی، باڵیۆزی ئەمریکا لە عێراق لە تۆڕی ئێکس باسیلەوەکردووە، “گفتوگۆی شاندی هاوبەشی نێوان عێراق و ئەمریکا لە واشنتن لەسەر داهاتووى ئەرکی هاوپەیمانى نێودەوڵەتى لە عێراق و بەهێزکردنى هاریکاریی ئەمنی نێوان هەردوو وڵات دەبێت”.
لە سەرەتای مانگی شوباتی 2023 وە، دانوستانەکانی نێوان بەغدا و واشنتن لەسەر پرسی کۆتاییهێنان و کشانەوەی هێزەکان بیانییەکان دەستی پێکردووە.
سابت محەمەد، وەزیرى بەرگرى عێراق پێشتر لە بەیاننامەیەکدا رایگەیاندبوو، هێزە چەکدارەکانى عێراق ئامادەکارى تەواویان بۆ کشانەوەی هێزەکانی هاوپەیمانان و کۆنترۆڵکردنی تەواوی مەلەفی ئەمنی لە وڵاتدا کردووە.
“کاتی کشانەوەی هێزەکانی هاوپەیمانان دیاری دەکرێت و پەیوەندی هاوکاری هاوبەش لە نێوان عێراق و ئەمریکا و وڵاتانی هاوپەیمانان لە بوارە جیاجیاکانی سیاسی، ئابوری، کولتووری، ئەمنی، و سەربازیدا بنیات دەنرێت، کە هاوتەریب بێت لەگەڵ دیدگای حکومەتی عێراق”، وەزیرى بەرگرى عێراق وای وت.
