خشتەى دابەشکردنى موچەى پێشمەرگە و هێزە ئەمنییەکان راگەیەندرا

964+

وریا فەتاح

سەرەڕاى ئەوەى بەغداد کەمى ناردووە، بەڵام وەزارەتى دارایى و ئابوورى، خشتەى هەردوو موچەى مانگەکانى ئایار و حوزەیرانى پێشمەرگە و هێزە ئەمنییەکان بڵاوکردەوە.

موچەى مانگى پێنج و شەشى پێشمەرگە و ئاسایش و زێرەڤانى و پۆلیسى نەوت و هێزەکانى 70 و 80 دابەشدەکرێت

بەپێى خشتەکە بێت، رۆژى چوارشەممە 17.7.2024، ئەنجومەنى ئاسایش و دەزگاى ئاسایش و بەڕێوەبەرایەتى پۆلیسى پاراستنى دامودەزگا نەوتییەکان، موچە وەردەگرن.

هەریەک لە وەزارەتى پێشمەرگە، هێزەکانى یەکەى 70 و 80، زێرەڤانى، بەرگرى و فریاکەوتن، رۆژى پێنجشەممە 18.7.2024، موچە وەردەگرن.

وەزارەتى دارایى و ئابورى بڵاوى کردووەتەوە کە بڕى 26 ملیار و 790 ملیۆن دینار کورتهێنان لە کۆى موچەى ئەو دوو مانگەى هێزەکانى پێشمەرگە و دەزگا ئەمنییەکان دروست بووە و ئەو بڕە پارەیە لە شایستەى تەمویلەکەیان لە بەغداوە نەنێردراوە.

موچەی هێزە ئەمنییەكانی كوردستان گەیشت

ئەوەش لە کاتێکدایە، ئەمڕۆ سێشەممە، ەزارەتی دارایی هەرێمی كوردستان رایگەیاند، بڕی (676 ) ملیار دینار  وەک شایستەی موچەی مانگی ئایار و حوزەیرانی هێزەکانی پێشمەرگە و دامودەزگا ئەمنییەكانی هەرێمی کوردستان خرایە سەر هەژماری بانکی وەزارەتی دارایی و ئابووری لە لقی هەولێری بانکی ناوەندیی عێراق.

ماوەی زیاتر لە دوو مانگ بوو، وەزارەتی دارایی عێراق شایستە داراییەكانی هەردوو مانگی پێنج و شەشی رابردووی هێزەكانی پێشمەرگە و دامودەزگا ئەمنییەکانی هەرێمی کوردستانی نەناردبوو.