لۆگۆی بەڕێوەبەرایەتیی حەج و عەمرەی هەرێم
نرخەکەشی دیار نییە
تا کۆمپانیاکان گرێبەست نوێنەکەنەوە گەشتی عەمرە ئەنجام نادرێتەوە
964+
پێشەوا محەمەد
ئەو کۆمپانیایانەی لە هەرێم و سعودییەوە گەشتیار بۆ عەمرە دەگوازنەوە مۆڵەتەکانیان تەواو بووە، حەج و عەمرەی هەرێم دەڵێت، پێویستە سەرجەمیان گرێبەستەکانیان نوێ بکەنەوە.
ساڵانە بەر لە وادەی هاتنی جەژنی قوربان و وەستانی گەشتی عەمرە، گرێبەستی کۆمپانیاکان کە هاوڵاتیان دەگوازنەوە کۆتایی دێت و دوای جەژنی قوربانیش دەبێت بچن تازەی بکەنەوە.
کاروان ستوونی، وتەبێژی بەڕێوەبەرایەتیی حەج و عەمرەی هەرێم بە 964ـی راگەیاند، گرێبەستی سەرجەم کۆمپانیاکانی هەرێم و سعودییەش کۆتاییان هاتووە و پێویستە سەردانی بەڕێوەبەرایەتییەکە بکەن بۆ نوێکردنەوەی.
بەپێی ئاماری بەڕێوەبەرایەتییەکە، 300 کۆمپانیای هەرێم و سعودییە گەشتی هاوڵاتیانی هەرێم بۆ سعودییە بە مەبەستی ئەنجامدانی عەمرە رێکدەخەن.
سەبارەت بە نرخی گەشتی عەمرە، وتەبێژی حەج و عەمرەی هەرێم وتی، “نرخەکان جارێ دیار نین و بەپێی خزمەتگوزاریی کۆمپانیاکان دیاری دەکرێن”.
ئەمساڵ نزیکەی 30 حاجیی هەرێم لە کاتی ئەنجامدانی فەڕیزەی حەجدا گیانیان لە دەست دا، کاروان ستوونی دەڵێت، “هەر کۆمپانیایەک بزانین کەمتەرخەم بووە و ئاشکرا ببێت سزا دەدرێت و لێپێچینەوەی لەگەڵ دەکرێت”.
