سەرۆک وەزیرانی هه‌رێمی كوردستان مەسرور بارزانی
نزای سه‌لامه‌تییان بۆ ده‌كه‌ن
سه‌رۆك وه‌زیرانی كوردستان نیگه‌رانیی خۆی بۆ چاره‌نووسی سه‌رۆكی ئێران ده‌ربڕی
964+
ئه‌رسه‌لان عه‌بدوڵا
سەرۆک وەزیرانی هه‌رێمی كوردستان مەسرور بارزانی رایگەیاند، رووداوی کەوتنەخوارەوەی هێلیکۆپتەرەکەی سه‌رۆك كۆماری ئێران مایەی نیگەرانیانە، نزا بۆ سەلامەتی سەرۆكی ئێران و سەرنشینانی هێلیکۆپتەرەکە دەکەن.
مەسرور بارزانی، سەرۆکوەزیرانی هەرێمی کوردستان لە پەیامێکدا لە ئه‌كاونتی خۆی لە تۆڕی کۆمەڵایەتی ئێکس رایگەیاند، “رووداوی کەوتنەخوارەوەی هێلیکۆپتەری سەرۆک کۆماری ئێران مایەی نیگەرانیمانە، هیوادارم سەرۆک ره‌ئیسی و سەرنشینەکانی دیکە سەلامەت بن”.
هه‌روه‌ها ده‌ڵێت، “دڵمان لەلای خۆیان و خێزانەکانیانە و نزا بۆ سەلامەتی هەموویان دەکەین”.
هێلیکۆپتەرەکە نەیهێشت سەرۆکی ئێران بگاتە هەولێر
ئێواره‌ی ئه‌مڕۆ یه‌كشه‌ممه 19.5.2024 هێلیکۆپتەرێک کە ئیبراهیم رەئیسی، سەرۆک کۆماری ئێران و وه‌زیری ده‌ره‌وه و ژماره‌یه‌ك له سه‌رنشینی دیكه‌ی له‌گه‌ڵدا بوو، كاتێك به‌ره‌و تاران ده‌گه‌ڕانه‌وه، له سنووری شاری ته‌ورێز دیار نه‌ماوه و وه‌ك وه‌زیری ناوخۆی ئێران ده‌ڵێت، تووشی نیشتنه‌وه‌یه‌كی زه‌حمه‌ت بوونه به‌هۆی خراپیی كه‌شوهه‌وا و ته‌مومژه‌وه، تا ئێستاش چاره‌نووسیان نادیاره، هاوكات دوو هێلیكۆپته‌ری دیكه یاوه‌ری هێلیكۆپته‌ره‌كه‌ی سه‌رۆكی ئێران بوون، به‌ڵام ئه‌وان سه‌لامه‌تن.
له نوێترین زانیاریشدا سوپای پاسدارانی ئێران ده‌ڵێت، شوێنی كه‌وتنی هێلیكۆپته‌ره‌كه‌یان ده‌ستنیشان كردووه.
