شوێنی خۆراکی بەسەرچوو و خراپبوو لە کۆگایەکدا - وێنە: قایمقامیەتی سلێمانی
"شوێنی خۆراکی بەسەرچوو دابنێن"
لە سلێمانی هۆشداری دەدرێتە کۆگا و فرۆشگاکانی خۆراک
964+
پێشەوا محەمەد
قایمقامیەتی سلێمانی هۆشداری دەداتە کۆگا و فرۆشگاکانی خۆراک، کە پێویستە شوێنی تایبەت بە خۆراکی بەسەرچوویان هەبێت و لێیبنووسن بۆ فرۆشتن نییە.
قایمقامیەتی سلێمانی ئەمڕۆ پێنجشەممە 2.5.2024 لە زاری جەمال محەمەد، سەرۆکی لیژنەی کۆگاکانەوە بڵاویکردووەتەوە، لە هەموو سەردان و بەدواداچوونەکاندا ئاگادارییان داوە بە کۆگا و فرۆشگاکان و بەشی زۆریان پابەند بوون.
وتوشیەتی، “پێویستە ئەو شوێنە جیاکراوەیە تەنیا خۆراک و شمەکی ماوەبەسەرچوو و خراپبووی تێدا بێت و لێی نووسرابێت بۆ فرۆشتن نییە”.
لە راگەیەندراوەکەی قایمقامیەتی سلێمانیدا، سەرۆکی لیژنەی کۆگاکان هۆشداری داوەتە خاوەنی مارکێت و فرۆشگا و کۆگاکان و جەختیکردووەتەوە، لە هەر شوێنێک خواردن و شمەکی خراپبوو و بەسەرچوو لەلایەن لیژنەکانەوە ببینرێت ئەگەر جیانەکرابێتەوە بە سەرپێچی هەژمار دەکرێت.
“هەر مارکێت یان کۆگا و کارگەیەک ئەگەر شمەک و خواردنی ماوەبەسەرچووی هەبێت دەتوانێت لیژنە هاوبەشەکانی لێ ئاگادار بکاتەوە و تەواوی شمەک و خۆراکەکەی بۆ لەناودەبەن”، ئەوەش قسەی جەمال محەمەدە.
