بۆ ساڵی نوێ 19 کتێبی پرۆگرامەکانی خوێندن دەگۆڕێن

964+

فەهمی نەبی

وەزارەتی پەروەردە بڕیاریداوە بۆ ساڵی خوێندنی 2024-2025 گۆڕانکاریی لە 19 کتێبی پرۆگرامەکانی خوێندن بخاتە بەردەستی قوتابیان لە قۆناغەکانی بنەڕەتی و ئامادەیی.

حەسەن سەرتیپ بەڕێوەبەری پرۆگرامەکانی خوێندن لە وەزارەتی پەروەردە بۆ 964 قسەیکردووە دەڵێت: بۆ ساڵی نوێی خوێندن 19 کتێبی پرۆگرامەکانی خوێندن گۆڕانکاریان لێ بەسەر دێت زۆربەیان دوو وەرزن، هاوکات هەشت رێبەریش لە چاپدراون.

بەشێک لەو کتێبانەی ئەمساڵ گۆڕانیان لێ بەسەر دێت ئەمانەن:

بیرکاری پۆلی یەک

کوردی پۆلی دووەم

کوردی پۆلی چوارەم

کوردی پۆلی هەشت

زانستی پۆلی سێ و چوار

هونەری پۆلی یەک و دوو و سێ

وەرزشی پۆلەکانی حەوت و هەشت و نۆ

ئابوری پۆلی 10 و 11 و 12

جوگرافی پۆلی 10 و 11

مێژووی پۆلی 12

دەرونزانی پۆلی هەشت و 10

بەوتەی بەڕێوەبەری گشتی پرۆگرامەکان بێت، سەرجەمی ئەو کتێبانە گۆڕینی بنەڕەتی بۆکراوە، لیژنەی باڵای پڕۆگرامەکان کاری لەسەر کردووە و سەرجەم پارێزگاکان بەشداربوونە لەداڕشتنی.

“وەزارەتی پەروەردە لەساڵانی 2008 و 2009 گرێبەستی لەگەڵ کۆمپانیایەکی لوبنانی کرا و پرۆگرامی زانست و بیرکاریان گۆڕی، بەڵام پرۆسەکە سەرکەوتوو نەبوو، پارەیەکی زۆر لە هەرێم رۆیی و نەتوانرا بگەینە ئامانجێکی دیاریکراو، بەڵام لەم کابینەیە %60ی پرۆگرامەکان گۆڕانیان لێ کراوە” حەسەن سەرتیپ وای وت.

ئەوەشی وت، “پەیمانگەی پیشەیی پێنج ساڵەمان دروستکردووە ئەمساڵ 45 کتێبی بۆ دروست دەکرێت بەزمانی ئینگلیزی، ئەمساڵ لەمانگی حەوت تەواو دەبێت”.

پرۆگرامی خوێندنی پۆلی 12 كه‌مكرایه‌وه‌