لۆگۆی بەڕێوەبەرایەتیی تەندروستیی کۆیە
کوڕەکەی گیانی لەدەست دا
تەندروستیی ئەو دایکە چۆنە کە دوێنێ لەگەڵ منداڵەکەی کارەبا گرتنی؟
964+
پێشەوا محەمەد
دایکی ئەو مێرمنداڵەی دوێنێ بەیەکەوە کارەبا گرتنی، نەخۆشخانەی جێهێشت، بەڵام منداڵە 10 ساڵانەکەی گیانی لەدەست دا.
دوێنێ شەممە لە کۆمەڵگەی قەڵاتە لە ناحیەی شوان، دایک و کوڕێک دەچنە سەربانی ماڵەکەیان بە مەبەستی کولێرەکردن، لەوکاتەدا دایکی دەست بە وایەرێکەوە دەگرێت کە وەک تەنافی جلهەڵخستن بەکاریانهێناوە، لەوکاتەدا کارەبا دەیگرێت و منداڵەکەشی لە هەوڵی رزگارکردنی دایکیدا کارەبا دەیگرێت و گیان لەدەست دەدات.
هاوکار عەلی، وتەبێژی بەڕێوەبەرایەتی تەندروستیی کۆیە بە 964ـی راگەیاند، دایکەکەیان بە بێهۆشی بردووە بۆ نەخۆشخانەی فریاکەوتنی کۆیە، بەڵام چارەسەری بۆ کراوە و ئەمڕۆ لە نەخۆشخانە دەرکراوە و نێردراوەتەوە ماڵەوە.
وتیشی، “کارەباکە بۆ سەر منداڵەکە بەهۆی تەمەنەکەیەوە کاریگەریی زۆر بووە و ئەو رووداوەی لێکەوتووەتەوە”.
ئەو مێرمنداڵەی گیانی لەدەستدا لە پۆلی چواری بنەڕەتی بوو، ئەمڕۆ یەکشەممە هاوڕێکانی لە قوتابخانە وێنەی ئەویان بەدەستەوە گرتبوو و لە شوێنەکەشی نێرگز و گوڵیان دانابوو، دواتر مامۆستاکانیشی گوڵیان بردە سەر گۆڕەکەی.
