بە تەقەى پاسداران چوار کۆڵبەر بریندار کران

964+

وریا فەتاح

چوار کۆڵبەرى کورد بە تەقەى هێزەکانى سوپاى پاسداران بریندار کران، تەنیا لەمساڵیشدا 91 کۆڵبەر کوژراون و بریندار بوون.

ئەرسەلان یار ئەحمەدى، سەرۆکى رێکخراوى مافى مرۆڤى هەنگاو بە 964ـى وت،”شەوى رابردوو، سێ کۆڵبەر بە ناوەکانى فواد کارگەر، خەڵکی گوندی بانەوەڕەی پاوە و دانیشتووی شاری جوانڕۆ، لەگەڵ سوهەیب، نازناوی نادیار و کۆڵبەرێکی دیکە کە نازناوى نادیارە، بە تەقەى راستەوخۆ و لێدانی بەرد لەلایەن هێزەکانی ئێرانەوە لە سنووری نەوسوودی پاوە بە سەختی بریندار کران.

وەک ئەوەى سەرۆکى رێکخراوى مافى مرۆڤى هەنگاو باسى لێوەکرد، بەپێى زانیارییەکانیان فواد کارگەر، بەهۆی سەختی برینەکەیەوە بۆ نەخۆشخانەی شاری پاوە گواستراوەتەوە و دواتریش رەوانەى بەشى چاودێرى چڕى نەخۆشخانەى ئەڵقانى شارى کرماشان کراوە و ئێستا لەوێ خەوێنراوە و بارى تەندروستى ناجێگیرە.

بەوتەى سەرۆکى رێکخراوى مافى مرۆڤى هەنگاو، بریندارى چوارەم ناوى کازم عوسمانی، تەمەن 28 ساڵە و خەڵکی شاری سەقزە و لە کاتی کۆڵبەریدا لە سنووری بەستامی شاری سەقز بە تەقەی راستەوخۆی هێزەکانی کۆماری ئیسلامیی ئێران پێی بریندار بووە و بۆ نەخۆشخانەی شەفا لەو شارە گواستراوەتەوە و لە ژێر چاودێری پزیشکیدایە.

بەپێى ئامارەکانى رێکخراوى مافى مرۆڤى هەنگاو، تەنیا لە 51 رۆژى سەرەتاى ساڵى 2024دا، 84 کۆڵبە بریندار کراون و هەشت کۆڵبەریش کوژراون.

سێ کۆڵبەر لە رۆژهەڵاتی کوردستان بریندار بوون