منداڵێك لەسەر شەقامەكان بنێشت دەفرۆشێت. وێنە: سۆشیاڵ میدیا
بەشێکیان لە بلیارد و کافتریاکان بوون
لە سلێمانی 550 منداڵی ئیشکەر لەسەر شەقام دوورخراونەتەوە
964+
ژووری هەواڵ
لە ساڵی 2023ـدا بەڕێوەبەرایەتی چاودێری و گەشەپێدانی کۆمەڵایەتی سلێمانی، 550 منداڵی ئیشکەری لەسەر شەقامەکان دوورخستووەتەوە و کاری پێویستی بۆیان ئەنجامداون تا نەگەڕێنەوە سەر شەقامەکان.
ئەمڕۆ چوارشەممە 3.1.2023، هێمن محەمەد وتەبێژی بەڕێوەبەرایەتی چاودێری و گەشەپێدانی کۆمەڵایەتی سلێمانی بە 964ـی راگەیاند، لە ساڵی 2023ـدا لیژنە هاوبەشەکانیان سێ هەزار و سێ سەردانی بۆ فولکە و جادەکانی ناوەندی سلێمانی ئەنجامداوە و 550 منداڵیان لە ئیشکردن دوورخستووەتەوە.
بەشێک لەو منداڵانە لەناو کافتریا، چێشتخانە، بلیارد، ساڵۆن، کارگە و کافیەکان کاریان کردووە و لێکۆڵینەوە لە کەیسەکانیان دەکرێت.
هیوا سەعید، سەرپەرشتیاری پەروەردەیی لە بەڕێوەبەرایەتییەکە راگەیاند، “سەردان و بەدواداچونەکان بە هاوکاری هەریەک لە رێکخراوی منداڵپارێزی کوردستان و هۆبەی پۆلیسی نەوجەوانان و بەرێوەبەرایەتی کاری سلێمانی و بە چاودێری قایمقامیەتی سلێمانی بووە”.
بڕیارە دەستەی مافی مرۆڤ و رێکخراوی یونسێف یەکەی پاراستنی منداڵ لە هەرێمی کوردستان پێکبهێنێت، کە کاری رووپێوی پێشێلکارییەکانە بەرامبەر بە منداڵان لە هەرێمی کوردستان و پێشکەشکردنی یاداشتی چارەسەرکردن و پاراستنیانە بە لایەنی پەیوەندیدار.
