کاتی رواندنی گوڵەباخەکان - وێنە: شارەوانی سلێمانی
لەژێر نۆژەنکردنەوەشدایە
پارکی هەواری شار گوڵباران دەکرێت
964+
پێشەوا محەمەد
زۆنی چواری پارکی هەواری شار لە رێگەی روواندنی هەزار و 600 گوڵەباخ بۆنخۆش کرا و دەروازەکەی بە چاندنی 150 فیتۆنیا و 200 رۆزماری سەوز کرا.
کارەکە ئەمڕۆ سێشەممە 2.1.2024 بە سەرپەرشتی بەڕێوەبەرایەتی ئیدارەی پارکی هەواری شار ئەنجام دراوە.
فەرەیدوون عومەر، بەڕێوەبەری پارکی هەواری شار بە 964ـی وت، “ئەو هەڵمەتە لە چوارچێوەی سەوزکردن و جوانترکردنی پارکەکەیە، هەرشوێنێک بۆشایی بێت سەوز دەکرێت و هەرشوێنێکیش سەوزاییەکی وشک بووبێت یان کێشەی هەبێت دووبارە سەوزی دەکەینەوە”.
دەشڵێت، هەڵمەتی سەوزکردنەکە لەناو پارکەکە بەردەوام دەبێت و هاوڵاتیان بەهاری داهاتوو پارکەکە بە سەوزتر و گەشاوەیی زیاتر دەبینن.
964 دەزانێت ئێستا پارکەکە لەژێر نۆژەنکردنەوەدایە، زیاتر لە 10 هەزار نەمامی نوێی تێدا رووێندراوە و پەرژینەکەی نوێ دەکرێتەوە و هەر شوێنێکیش کەرپستۆنی شەقامەکانی زیانی پێگەیشتبێت چاک دەکرێتەوە.
جگە لەوانەش چوار سێتی نوێی توالێت لە پارکی هەواری شاری سلێمانی دروست دەکرێت، بەڕێوەبەرەکەی دەڵێت بەوانەوە دەبنە 10 سێتی تەوالێت.
