کرێکارێک دوێنێ لەکاتی کارکردن برینداربوو ئەمڕۆ گیانی لەدەستدا

964+

شۆڕش هەرکی – هەولێر

دوێنێ دووشەممە کرێکارێک سەرقاڵی کارکردن بوو، لەپڕ لەسەر ئەسکەلەکەی ژێر قاچی کەوتەخوارەوە و بە سەختی برینداربوو، بەڵام ئەمڕۆ لە نەخۆشخانە هەواڵی گیان لەدەستدانی بە کەسوکاری درا.

رووداوەکە رۆژی 27.11.2023 لە ناحیەی بەحرکەی پارێزگای هەولێر روویداوە، بەپەلە کرێکارەکە گواستراوەتەوە بۆ نەخۆشخانە، بەڵام سەختی برینەکەی هاوکار نەبووە لە بەردەوامیدان بە ژیان.

ئەمڕۆ سێشەممە 28.11.2023، سەرچاوەیەکی تەندروستی هەواڵەکەی بۆ 964 پشتراست کردەوە و ئەوەشی وت، کرێکارەکە تەمەنی 20 ساڵە و کاری گەچکاری دەکرد، خەڵکی دەڤەری زرارەتی پارێزگای هەولێرە، بەڵام دانیشتووی ناحیەی بەحرکە بووە.

بەپێی ئاماری سەندیکای کرێکارانی کوردستان بێت، ئەمساڵ تەنیا لە هەولێر 10 کرێکار، لە چەند رووداوێکی جیاوازدا گیانیان لەدەستداوە.

پێداچوونەوە: ئەحمەد مستەفا