لە سنووری هەولێر
49 بازرگانی مادەی هۆشبەر دەستگیر کران
964
شۆڕش هەرکی— هەولێر
بەڕێوەبەرایەتیی نەهێشتنی مادەی هۆشبەر دەڵێت، لە ماوەی 20 رۆژی رابردوو لە 17 چالاکی سەرکەوتوودا لە هەرسێ بنکەی ( دهۆک و سۆران و حاجی ئۆمەران) 49 بازرگانی مادەی هۆشبەر دەستگیرکراون.
ئەرکان عومەر، ئەفسەر لە بەڕێوەبەرایەتیی نەهێشتنی مادەی هۆشبەر لە هەولێر، بە 964ی وت، بڕی ئەو مادانەی لەو چالاکییانەدا دەستیان بەسەردا گیراوە، بەم شێوەیە بووە، هەشت کیلۆ و 129 گرام مادەی تلیاک، دوو کیلۆگرام مادەی هیرۆین و یەک کیلۆ و 681 گرام مادەی کریستاڵ و بڕێکیش مادەی حەشیش.
وتیشی: بڕی 229 کیلۆ و 500 گرام لە حەبی هۆشبەری جۆری کاپتاگۆن و نزیکەی 1000 دەنکە حەب لە جۆرەکانی ترامادۆل و میتادۆن و تریفین، ژمارەیەک لەو دەستگیرکراوانە کەسانی گەورە بازرگانن و ئەندامی سێ تۆڕی بازرگانی نێودەوڵەتین و بە هۆی دەستگیرکردنیان تۆڕەکانیان هەڵوەشاوە.
ئاماژەی بەوەشدا، یەکێک لەو چالاکییانەی ئەنجامدراوە، بە هەماهەنگی لەگەڵ بەڕێوەبەرایەتیی نەهێشتنی مادە هۆشبەرەکانی حکومەتی عێراق بووە.
پێداچوونەوە: ئەرسەلان عەبدوڵا
