کێشەت کارەبای مۆلیدەکەت هەبوو پەیوەندی بەم ژمارانە بکە

964+

فەرمان سادق

لەگەڵ هاتنی وەرزی هاوین سکاڵای دانیشتووانی دەربەندیخان لەسەر مۆلیدە ئەهلییەکان زیادی کردووە و تاوەکو ئێستا سێ مۆلیدە سزا دراون.

لیژنە هاوبەشە هەمیشەییەکەی قەزای دەربەندیخان ماوەی 42 بەردەوامن لە گەڕان و بەسەرکردنەوەی مۆلیدەکانی کارەبا لەسەر سکاڵای دانیشتووان لەسەر کێشە و گرفت لە ڤۆڵتییەدا.

نوری مەحمود، نوێنەری فەرمانگەی کارەبای دەربەندیخان بە 964ـی وت، لە ماوەی 42 رۆژی دەستبەکاربوونمان سێ خاوەن مۆلیدە سزای دارایی دراون لەسەر پابەندنەبوون بە رێنماییەکان و چاک نەکردنی مۆلیدەکانیان.

دەشڵێت: پێش بڕیاری سزادان، خاوەن مۆلیدەکان سەرنجڕاکێشانیان بۆ دەکرێت کە کێشە و گرفتەکانیان چارەسەر بکەن، ئەگەر نەیکەن ئەوا ئینجا بڕیاری سزادانی بۆ دەدرێت.

لیژنەکەی قایمقامیەت پێکهاتووە لە نوێنەرانی فەرمانگەی کارەبا و سووتەمەنی و ئاسایش. لیژنەیەکی هەمیشەییە و هەموو شەش مانگ جارێک نوێنەرەکانیان دەگۆڕدێن.

نوری مەحمود دەشڵێت: ئەگەر رۆژانە دەرچوونمان نەبێت، ئەوا رۆژێ نا رۆژێک دەرچوونمان هەیە جا ئەگەر لەسەر سکاڵای هاوڵاتیان بێت یان سەردانی لەناکاوی خۆمان بێت بۆ سەر مۆلیدەکان بە مەبەستی چاودێریکردن و پشکنینیان.

قایمقامیەتی دەربەندیخان، ژمارە مۆبایلی هەر سێ ئەندامەکەی لیژنەکەی داناوە و داوا لە دانیشتووانی دەربەندیخان دەکات ئەگەر سکاڵایان هەیە، یان دەیانەوێت زانیاری لەسەر مۆلیدە ئەهلییەکان بدەن بە قایمقامیەت، ئەوا پەیوەندییان پێوە بکەن.

ژمارە مۆبایلی ئەندامانی لیژنەکە:

  • 07701486353
  • 07723851212
  • 07719917750