وێنەی بکوژەکە و دوو ئەندامی ئاسایشی هەولێر. فۆتۆ: ئاسایشی هەولێر
بکوژی سێ کەسەکەی کەرکوک لە هەولێر دەستگیرکرا
964+
هاوبەش ئەبوبەکر
ئەو زاوایەی لە کەرکوک خەزور و خەسو و ژنەکەی کوشت، لە هەولێر دەستگیر کرا.
ئاسایشی هەولێر رایگەیاند، سەرەتا زانیاریان بەدەست گەیشتووە کە تۆمەتبارەکە بەرەو شاری سلێمانی هەڵدێت، بەڵام دواتر بۆیان ئاشکرابووە کە دێتە هەولێر.
” لە 3.8.2023، لەگەڕەکی کەرامەی شاری کەرکووک تۆمەتبارێک بەناوی (ه. م. ع.) بە چەک هێرشیکردە سەرماڵی خەزووری و بووە هۆی کوژرانی خەزووری بەناوی (ئەحمەد عەباس ساڵح) و خەسووی بەناوی (شلێر ساڵح) و خێزانی تۆمەتبارەکە بەناوی (فێنک ئەحمەد عەباس) و برینداربوونی کوڕە غەزوورەکەی بەناوی (محەممەد عەباس ساڵح)”، ئاسایشی هەولێر وا دەڵێت.
تۆمەتبارەکە بەهەماهەنگی لەگەڵ هێزەكانی ناوخۆ و بەڕێوەبەرايەتی پۆليسی هەولێر و بەڕێوەبەرايەتی بازگەكان دەستگیرکراوە.
رائید عامر نووری، وتەبێژی پۆلیسی کەرکوک هەواڵەکەی بۆ 964 پشتراستکردەوە و وتی، “هێشتا تۆمەتبارەکە رادەستی ئێمە نەکراوەتەوە”.