یونس محەمەد و فۆتۆکانی لە ئەمریکان

964+

پێشەوا محەمەد

یونس محەمەدی فۆتۆگرافەر ژمارەیەک پێشانگای فۆتۆیی لە چەند شارێکی جیاوازی ئەمریکا دەکاتەوە و دەڵێت، دەیەوێت ناسنامەی کورد و ژیانی پێشمەرگە بگوازێتەوە.

لە سەرەتادا پێشانگای لە شاری ناشڤیل کردەوە و ئەمڕۆ کۆتاڕۆژی پێشانگاکە بوو، دواتریش پێشانگایەک لە کۆنگرێسی ئەمریکا لە شاری واشنتۆن دەکاتەوە و پێشانگای سێیەمیشی هەر لەو شارە لە باڵەخانەی نوێنەرایەتی حکومەتی هەرێمدا دەبێت.

پێشانگاکان لە لایەن رێکخراوی رۆحی ئەمریکا و نوێنەرایەتی حکومەتی هەرێم رێکخراون.

یونس محەمەدی فۆتۆگرافەر بە 964ی راگەیاند، بەشێک لە وێنەکان باسی شەڕی داعش و بەرگری هێزی پێشمەرگە و قوربانیدانیانە و بەشێکی تریان باسی ژیان و ناساندنی کوردستان دەکات.

سێیەم بەشی وێنەکانیشی روونکردەوە و وتی، “بەشی سێیەم ژیان و بارودۆخی پێشمەرگە بریندارەکانی شەڕی دژ بە داعشم پیشانداوە”.

یونس محەمەد فۆتۆگرافەرێکی کوردە و لەدایکبووی سالی 1968ـی شاری دهۆکە. فۆتۆگرافەرێکی فریلانسە و کارەکانی ناسراو و بڵاون. ئەو زیاتر لەسەر کورد و ناسنامەکەی کاردەکات.

بەشداری زیاتر لە 150 پێشانگای تایبەت و هاوبەش لە زیاتر لە 50 وڵاتی دونیا کردووە.