داهاتی ئەم هەفتەیەی سلێمانی و هەڵەبجە زیاتر لە 12 ملیار دینارە
بەراورد بە هەفتەی پێشوو زیادیکردووە
داهاتی ئەم هەفتەیەی سلێمانی و هەڵەبجە زیاتر لە 12 ملیار دینارە
964+
شۆڕش قادری
داهاتی نانەوتی ئەم هەفتەیەی هەر دوو پارێزگای سلێمانی وهەڵەبجە بەهەردوو ئیدارەی گەرمیان و راپەڕینەوە زیاتر لە 12 ملیار دینارە و بەراورد بە هەفتەی رابردوو زیاتربووە.
ماڵپەڕی شەفافیەت داتا و ئاماری سەبارەت بە داهاتی نانەوتیی ئەم هەفتەیەی سنووری سلێمانی و هەڵەبجە و هەردوو ئیدارەی راپەڕین و گەرمیانی بڵاوکردووەتەوە و رایگەیاندوو، داهاتەکە لە رۆژی 24.1.2026 تا ئەمڕۆ هەینی 30.1.2026، 12 ملیار و 359 ملیۆن و 909 هەزار و 835 دینارە، لەکاتێکدا هەفتەی پێشوو 10 ملیار و 512 ملیۆن و 158 هەزار و 978 دینار بوو.
لە داهاتی ئەم هەفتەیەی پارێزگاکانی سلێمانی و هەڵەبجە، بڕی 11 ملیار و 284 ملیۆن و 290 هەزار و 765 دیناری بە شێوەی نەختینە و یەک ملیار و 75 ملیۆن و 619 هەزار و 70 دیناریشی چەکە.
ماڵپەڕی شەفافییەت هەموو هەفتەیەک داهاتە نانەوتییەکانی هەریەکە لە پارێزگاکانی سلێمانی، هەڵەبجە و ئیدارە سەربەخۆکانی گەرمیان و راپەڕین دەخاتەڕوو.
ئەو داهاتەی ماڵپەڕەکە ئاشکرای دەکات، لە دەروازە سنوورییەکان، فڕۆکەخانە، گومرگ، کرێی کێش و پێوەرەکان، پێبژاردن و سزای دارایی، پشکنینەکان، رسووماتی بەخشین، ژینگەی ئۆتۆمبێل، تابلۆ و داهاتی شارەوانییەکان، بەدەستهاتووە.
