24 ساڵی رەبەق لەگەڵ مردندا
چیرۆکە نهێنییەکانی ناو پزیشکی دادی سلێمانی
964+
دیلان محەمەد – سلێمانی
بۆ ماوەی 24 ساڵە، ژیانی لەگەڵ مردندا بەسەر دەبات، د. بەرزان محەمەد، بەڕێوەبەری پزیشکی دادی سلێمانی، کاتێک بە ریشێکی رەشەوە چووەتە ئەو دامەزراوەیە، ئێستا دوای تێپەڕبوونی ئەو هەموو ساڵە، قژ و ریشی سپی بووە، ئەو پزیشکە باس لەوە دەکات کە لە ماوەی کارکردنیدا، توێکاری بۆ زیاتر لە حەوت هەزار تەرم کردووە، ئەمەش نیشانەی ئەزموونێکی زۆریەتی لە بواری پزیشکی دادیدا.
د. بەرزان محەمەد، بەڕێوەبەری پزیشکی دادی سلێمانی، بۆ 964 باسی ئەزموونی خۆی کرد و وتی، پزیشکی دادی تەنیا مامەڵەکردن لەگەڵ تەرم نییە، بەڵکو رووبەڕووبوونەوەی هەموو رووداوە سەخت و ناخۆشەکانی کۆمەڵگەیە.
ئەو چیرۆکێکی کاریگەر دەگێڕێتەوە کە تێیدا کەسێک دوای مردنی کوڕەکەی، داوای لێبوردنی لێکردووە لەبەر ئەوەی پێشتر سوکایەتی پێکردبوو، ئەمە نیشانەی قورسیی کارەکەیان و ئەو بارە دەروونییەیە کە لەسەر شانیانە.
پزیشکی دادی لە سلێمانی، سەرەڕای گرنگییەکەی، کەموكوڕی زۆری هەیە. د. بەرزان باس لەوە دەکات کە بەشێک لە پزیشکەکان بۆ خوێندنی باڵا لە بواری DNA چوونەتە دەرەوەی وڵات، بەڵام کاتێک گەڕاونەتەوە، ئامێری پێویستیان بۆ دابین نەکراوە، ئەمەش کێشەیەکی گەورەیە، چونکە پشکنینی DNA بۆ یەکلاییکردنەوەی زۆرێک لە کەیسەکان، بەتایبەت کەیسی تاوانەکان، زۆر پێویستە.
