مژدەیەكی خۆش بۆ خەڵكی چەمچەماڵ
دروستكردنی حەوزێكی 20 هەزار مەتر سێجا بۆ پرۆژەی ئاوی گۆپتەپە- چەمچەماڵ
964+
محەمەد فاتیح
بۆ پرۆژەی ئاوی گۆپتەپە- چەمچەماڵ، دەست بە بنیاتنانی حەوزى 20 هەزار مەتر سێجای بانی مەقان کرا.
لەچوارچێوەی پرۆژەی ئاوی گوپتەپە- چەمچەماڵ، دوای دەستپێکردنی بنیاتنانی حەوزەکانی گۆپتەپە و ئاغجەلەر و تەکیە، ئەمڕۆ چوارشەممە، دەستكرا بە کارکردن لە بنیاتنانی حەوزی 20 هەزار مەترسێجای بانی مەقان.
قایمقامیەتی قەزای چەمچەماڵ، بڵاویكردەوە، ئەم حەوزە دوو هێندەی حەوزی پێشووی چەمچەماڵە کە لەبناری مەقان بنیاتنراوە و توانای گلدانەوەی 20 هەزار مەتر سێجا ئاوی هەیە و لەسەر رووبەری 45 مەتر پانی و 96 مەتر درێژی لە بەرزایی بانی مەقان دروست دەکرێت و بۆ دابەشکردنی ئاو هیچ ترۆمپایەکی ناوێت.
“دوای تەواوبوونی سەرجەم خەزانەکانی ئاو لە گۆپتەپە و ئاغجەلەر و تەکیە و بان مەقان، دواتر دەست بە راکێشانی بۆڕی دەکرێت”.
رەمک رەمەزان قایمقامی چەمچەماڵ كه بەیاوەری زیاد جاندار بەڕێوەبەری ئاوی چەمچەماڵ سەردانی پرۆژەکەی کرد وتى، “سەرجەم رێگرییە ئیداری و کۆمەڵایەتی و ئەمنی و یاسایی و کشتوکاڵیەکانی بەردەم پرۆژەکە چارەسەرکراوە، تەنها داواکارین، بەشێوەیەکی رێکوپێک، بودجەی پرۆژەکە بۆ کومپانیای جێبەجێکار دابین بکرێت”.
ئەگەر كێشەی دارایی نەبێت بەماوەی ساڵێك پرۆژەی ئاوى كۆپتەپە چەمچەماڵ تەواو دەبێت
