سەرۆک وەزیرانی ههرێمی كوردستان مەسرور بارزانی
"کێشەی هەولێر و بەغدا سیاسییە"
مەسرور بارزانی: شاندێک بۆ چارەسەری موچەبڕین لە بەغدایە
964+
ژووری هەواڵ
، سەرۆکوەزیرانی هەرێمی کوردستان مەسرور بارزانی رایگەیاند، کار بۆ ئەوە دەکەن لە نزیکترین کاتدا کێشەی موچەبڕینی خەڵکی کوردستان چارەسەر بکرێت و بۆ ئەو مەبەستەش شاندێک ئێستا لە بەغدایە.
“کێشەی ئێمە لەگەڵ حکومەتی فیدراڵ کێشەیەکی سیاسییە نەک تەکنیکی، چونکە بەداخەوە لە بەغدا بە شێوەیەکی ناڕەوا و نادادپەروەرانە و بە جیاکاری و بە شێوەیەکی نادەستووریی مامەڵە لەگەڵ هەرێمی کوردستان دەکرێت”، مەسرور بارزانی وای وت.
مەسرور بارزانی ئەم قسانەی لە کۆبوونەوەیدا لەگەڵ ژمارەیەک کادری ئۆرگانەکانی پارتی کردووە و قسەکانی لە ماڵپەڕی فەرمی پارتی دیموکراتی کوردستان بڵاوکراوەتەوە.
ئاماژەی بەوەش کردووە، هەرێمی کوردستان، هەرگیز دەستبەرداری هیچ مافێکی دەستووریی خۆی نابێت، عێراق وڵاتێکی فیدراڵییە و هەرێمی کوردستانیش قەوارەیەکی دەستووریی هەیە و دەبێت رێز لە دەسەڵات و مافە دەستوورییەکانی هەرێمی کوردستان بگیرێت.
مەسرور بارزانی هەروەها دەڵێت، هەرێمی کوردستان هەمیشە فاکتەرێکی سەرەکیی سەقامگیریی و ئارامی دەبێت لە ناوچەکەدا و نابێتە هەڕەشە و مەترسی بۆ هیچ لایەک.
