وێنە-964+-مانگرتوانی دەربەندیخان
خۆپیشاندان دوو کاتژمێر کارەبای بۆ دەربەندیخان زیادکرد
964+
هاوبەش ئەبوبەکر
ئەمڕۆ سێشەممە بڕیاردرا رۆژانە بڕی دوو کاتژمێر زیاتر کارەبای نیشتمانی بۆ قەزای دەربەندیخان دابین بکرێت، قایمقامیەتی قەزاکە دەڵێت، ئەمە بە لەبەرچاوگردنی دۆخی مانگرتوان و خۆپیشاندەرانە.
قایمقامیەتی قەزای دەربەندیخان ئەمڕۆ راگەیەندراوێکی بڵاوکردەوە و دەڵێت “بە لەبەرچاوگرتنی دۆخی مانگرتووان و چالاکوانان و خۆپیشاندەران، بە پشتیوانی چین و توێژەکانی قەزای دەربەندیخان و سەرجەم لایەنە سیاسیەکان بڕیاردرا بە زیادکردنی دوو کاتژمێر کارەبای نیشتمانی بۆ قەزای دەربەندیخان.”
دەشڵێت “هەوڵدان و کارکردن بەردەوام دەبێت بۆ زیاترکردنی کاتژمێرەکانی پێدانی کارەبای نیشتیمانی بە شاری دەربەندیخان.”
هاوڵاتیانی قەزای دەربەندیخان، ماوەی 14 رۆژە لە ناڕەزایەتی دەربڕین و خۆپیشاندان بەردەوامن و لەسەر شەقام دەمێننەوە، بەشێک لە خۆپیشاندەرانیش مانگرتنیان لە خواردن و خواردنەوە راگەیاندووە.
داواکارییەکانی خۆپێشاندەرانی دەربەندیخان پێکدێت لە سێ بابەتی سەرەکی، ئەوانیش دابینکردن و پاککردنەوەی ئاوی خواردنەوە، هەڵگرتنی پێوەری ئاو و زیادکردنی کاتژمێرەکانی کارەبای نیشتمانی.
هەفتەی رابردوو ئەنجومەنی وەزیرانی هەرێمی کوردستان کۆبووەوە و بڕیاری دا بە چارەسەرکردنی کێشەی ئاو و کارەبای قەزاکە و رایگەیاند، لایەنە پەیوەندیدارەکانی حکومەت راسپێردران، کار بۆ باشترکردنی خزمەتگوازییەکان و نەهێشتنی کێشە و گرفتەکان بکەن.
قەزای دەربەندیخان سەر بە پارێزگای سلێمانییە و خاوەنی یەکێکە لە بەنداوە گەورەکانی هەرێمی کوردستان، بەڵام خەڵکەکەی بەدەست کێشەی ئاوی خواردنەوە و بێکارەباییەوە دەناڵێنن.