هەشت تاوەری کارەبا چەماونەتەوە
رەشەبای بەهێز چوار گوندی ناوچەی داودەی بێ کارەبا کرد
+964
سیروان خورشید – دوزخورماتوو
رەشەبا بەهێزەکەی چەند رۆژی رابردوو لە ناوچەی داودەی سنوری خورماتوو ژمارەیەک تاوەری کارەبای چەماندووەتەوە و کارەبای چوار گوندی ناوچەکەشی بڕیوە.
فازڵ عەباس، بەڕێوەبەری بەشی کارەبای خورماتوو بە 964ـی وت، “ئەو ستونانەی چەماونەتەوە یاخود شکاون بەشێکیان زۆر کۆن بوون و بەرگەی ئەو رەشەبا بەهێزەیان نەگرتوە و چەماونەتەوە و شکاون، بۆیە بەکەڵکی نۆژەنکردنەوە و چاککردنەوەش نایەن و بڕیارماندا سەرجەم ئەو تاوەرانە بگۆڕین کە ژمارەیان هەشت تاوەر و سێ کێبڵی گەورەی گەیاندنی کارەبایە بۆ گوندەکان”.
وتیشی، لەئێستادا تیمێکمان راسپاردووە تاکو بچن ئەو تاوەرە کۆنانە لابەرن و شوێنی تر بۆ تاوەرە نوێیەکان ئامادە بکەن و لەکاتی تەواوبونی کارەکان کە دوو رۆژ دەخایەنێت و پاشان دەستبەجێ تاوەرە نوێیەکان دادەنێن و کێشەی کارەبای ناوچەکە بەتەواوی چارەسەر دەکرێن.
پێداچوونەوە: هاوبەش
