هەمواری یاسای خانەنشینی کێشە بۆ هەندێک بەڕێوەبەرایەتی دروست دەکات

شۆڕش قادری

دوای بڕیارەکەی حکومەتی هەرێم بۆ جێگیرکردنی تەمەنی خانەنشینی لە 60 ساڵیدا ژمارەیەکی زۆر فەرمانبەر و کارگوزار لە کوردستان خانەنشین دەبن و بەشێک لە بەڕێوەبەرایەتییەکان کێشەی کەمی کارمەندیان بۆ دروست دەبێت.

هەرچەندە هەندێک لە دامودەزگاکانی هەرێم کێشەیان نییە و هەر لەئێستاوە کەسیان حازرە بۆ پڕکردنەوەی شوێنی فەرمانبەرە بەئەزموونەکانیان، بەڵام ئەوەتا لە هەڵەبجە، بەڕێوەبەرایەتی دارستان و پاوان نزیکەی نیوەی کارمەندەکانیان خانەنشین دەبن و کەسیش نییە بچێتە شوێنەکانیان.

محەمەد مەحمود بەڕێوەبەری دارستان و پاوانی هەڵەبجە بە 964ـی وت، “ئێمە 47 کەسین، دوای بڕیارەکەی حکومەتی هەرێم 18 کەسمان خانەنشین دەبن و ئەوەش گرفتی گەورەمان بۆ دروست دەکات”.

ئاماژەی بەوەشکرد، بەڕێوەبەرایەتییەکەی ئەوان وەک شوێنەکانی دیکە نییە کە خەڵک خۆی بۆ بکوتێ و هەوڵ بدات دەستی لێ گیر ببێت، بەڵکو کەس نییە بچێتە شوێنی کارمەندە خانەنشینبووەکانیان و بە ئاسانی شوێنەکانیان پڕ نابێتەوە.

بەڕێوەبەری دارستان و پاوانی هەڵەبجە وتیشی، بۆ چاودێری دارستانەکان و بەدواداچوون بۆ پرسی ژینگە پێویستیان بە کارمەندی چوست و چالاکە و نابێ ئەو بابەتە پشتگوێ بخرێت.