سوریا دەکوڵێت و عێراق دوعای خێری بۆ دەکات…کورد ئامادەیەو جۆلانیش وازی لە ناوەکەی هێنا

964+

ژووری هەواڵ

رووداوەکانی سوریاو دەورووبەری زۆر خێران، هەموو سەری سەعاتێک چەند گۆڕانکارییەکی بەپەلە روودەدەن، چەکدارەکانی ئەحرار شام لە پێشڕەوی ناوەستن و ئێران دەیەوێت فریای رژێمەکەی ئەسەد بکەوێت، بەڵام ئیسرائیل بەوردی چاوەڕێی هەر جوڵەیەک دەکات، کوردیش دەڵێت ئامادەین، بەڵام چارەسەری سیاسیمان دەوێت.

لەوەتەی رۆژ بووەتەوە هەواڵی خێرا خێرا دێن، ئەمە پوختەی ئەو رووداوە گرنگانەیە کە هەتا 04:30ـى خولەکى پاشنیوەڕۆ روویانداوە:

حمس نزیکە لە کەوتن.. دیمەشق باری لارە

چەکدارەکانی ئەحرار شام دوێنێ شاری حەمایان کۆنترۆڵکرد، ئەمە دوو شاری گەورە لە ماوەی یەک هەفتەدا (حەلەب چوارشەممە کەوت)، دوێنێ ئەبو محەمەد جۆلانی (ئەحمەد شەرع) لەناو قەرەباڵغی خەڵکدا وتی ئامانجی داهاتوویان حمس و شام و دەرعاو دەیرزوورە، هەر دوێنێش لە حەماوە بەرەو حمس کەوتنە رێ.

سوپای سوریا دوێنێ شەو زۆر بە قورسی دەوروبەری حمسی بۆردمانکرد تا رێ لە پێشڕەوی ئەو هێزانە بگرێت، بەڵام بۆ بەیانی دەنگوباس گۆڕا.

ئێستا شارەکانی رستن و تەلبیسە و دار کەبیرەو تەیر معەلە لە سەرووی حمس کەوتوون، سوپای سوریا بۆ چەقی حمس کشاوەتەوە، ئەو ناوچەیەی سوپا جێی هێشتووە 50 کیلۆمەتری نێوان حەماو حمسە.

حمس بۆ گروپە چەکدارەکان و بۆ سوپای سوریاش یەکلاکەرەوەیە، چونکە ئەو شارە دەروازەی چوونە ناو دیمەشقی پایتەختە.

لە دیوی دەرعاش سوپا لە دەوروبەری شارەکە پاشەکشەی کردووەو ئەو ناوچانە کەوتووەتە دەست گروپە چەکدارەکان.

دەیرزوور لە ئان و ساتدایە
کەمێک پێش ئێستا میدیای نزیک لە دەستەی ئەحرار شام رایگەیاند سوپای سوریا لە دەیرزوور کشاوەتەوە بە ئاڕاستەی حمس و چەند کاتژمێرێکی تر دەیرزور دەکەوێتە دەست گروپە چەکدارەکان، لەگەڵ ئەم راگەیەندراوەدا چەند وێنەو ڤیدیۆیەکیان داناوە کە دەڵێن ئەمانە هی دەیرزوورن و تیایدا هەندێ ناوچەی گرنگی پیشانداوە کە سوپا جێیانهێشتووە.

ئێران بەنیازی ناردنی چەکەو ئیسرائیلیش ناهێڵێت

بەرپرسێکی باڵای ئێران بە ئاژانسی رۆیتەرزی وتووە،” ئێران دەیەوێت موشەک و درۆن بۆ سوریا بنێرێت و ژمارەی راوێژکارەکانی لەوێ زیاد بکات بۆ ئەوەی رێ لە کەوتنی رژێمەکەی ئەسەد بگرێت.
پێناچێت ئیسرائیل بهێڵێت بە ئاسانی ئێران دەستی بگاتەوە بە سوریا، رۆژی چوارشەممە میدیا ئیسرائیلییەکان وتبوویان، ئیسرائیل چاودێری دۆخەکە دەکات و ترسی هەیە ئێران بیەوێت پێگەی خۆی لەسوریا بەهێز بکاتەوە، بۆیە خۆی سازاندووەو رێگەشی نادات.

بۆ سەلماندی ئەمەش ئەم بەیانییە (هەینی) بۆ یەکەمجار دوای ئاگربڕی نێوان هەردوولا، ئیسرائیل سەرسنوری نێوان لوبنان و سوریای بۆردمان کردو سوپای ئیسرئیل رایگەیاند لەو رێگایەیان داوە کە حیزبوڵا بۆ بە قاچاغبردنی چەک بەکاری دەهێنێت و لەوێوە چەک دەباتە سوریا.

حەشدی شەعبی: هەقمان نییە بابەتێکی ناوخۆییە

قسەیەکی جدی هەبوو کە حەشدی شەعبی هێز بنێرێتە سوریا بۆ یارمەتیدانی سوپای سوریا، بەڵام ئەم بەیانییە فالح فەیاز سەرۆکی دەستەی حەشدی شەعبی وتی ”ئەوەی لەسوریا روودەدات بابەتێکی ناوخۆییەو پەیوەندی بە ئێمەوە نییە، بەڵام بۆ هەموو بارودۆخێکی لەناکاو ئامادەین”.
دوێنێش موقتەدا سەدر سەرۆکی رەوتی سەدر لەسەر ئێکس داوای لە حکومەتی عێراقی کرد نەهێڵێت هیچ هێزێک دەست وەربداتە کاروباری سوریا و ئەوەی وایکرد سزایان بدات، وتیشی ”ئەوەی لە دەستمان دێت دوعای خێرە”.

بەغدا فریای شام دەکەوێت؟

سوپای سوریا لە مەیدان شەکەتەو هیچی پێ ناکرێت، هەرچەندە دوێنێ وەزیری بەرگری سوریا وتی، کشانەوەیان لەو ناوچانە تاکتیکەو بۆ خۆ رێکخستنەوەیە، بەڵام کار لە تاکتیکدا نەماوەو ئەحرار شام روو لە هەر شوێنێک بکەن لە سوپای دەسەنن، پێدەچێت رژێمەکەی ئەسەد ئەوەی بە شەڕ لە دەستی داوە بیەوێت بە رێ دیبلۆماسییەکە وەریبگرێتەوە.
دوێنێ شەو بەسام سەباغ وەزیری دەرەوەی سوریا خۆی گەیاندە عێراق و ئەم بەیانییەش عەباس عێراقچی وەزیری دەرەوەی ئێران گەیشتە بەغدا، هەردووکیان لەگەڵ فوئاد حسێن وەزیری دەرەوەی عێراق کۆبوونەوە، دوای ئەوە عێراقچی محەمەد شیاع سودانی سەرۆک وەزیران و عەبدوللەتیف رەشیدی سەرۆک کۆماری بینی.

عێراقچی دوای دیدارەکانی وتی ”ئامانجمان هەماهەنگی زیارە بۆ پاڵپشتی گەل و حکومەتی سوریا”.

مەزڵوم عەبدی:

ئامادەین بۆ بەرگری، بەڵام چارەسەری سیاسیمان دەوێت

ئیدارەی خۆسەری رۆژئاوای کوردستان ترسی ئەوەی هەیە چەکدارەکانی ئەحرار شام روو لە دەیرزوور بکەن و لەوێ لەگەڵ داعشەکانی بیابانی سوریا یەک بگرنەوەو شەڕێک تووشی ئەمان بکەن، بۆیە خۆیان تەیارو ساز کردووە.

مەزڵوم عەبدی فەرماندەی هێزەکانی سوریای دیموکرات ئەم بەیانییە لە حەسەکە کۆنگرەیەکی رۆژنامەوانی گرێداو مەترسییەکانی خۆیانی بۆ بارودۆخە نوێیەکە خستەروو، ئەمە پوختەی قسەکانیەتی:

– پێمان سەیربوون سوپای سوریا بەو خێراییە ئەو هەموو ناوچەیەی دا بەدەستەوە.
– لە حەلەب ژمارەیەکی زۆری کورد هەن، ویستمان رێڕەوێکی مرۆییان بۆ بکەینەوە، بەڵام نەکرا.
– لەگەڵ هێزەکانی هاوپەیمانان لە پەیوەندیداین بۆ پاراستنی کوردانی حەلەب.
– 250 هەزار کورد لە حەلەب مەترسییان لەسەرەو ئێمە دەمانەوێت پارێزراوبن.
– لەگەڵ ئەحرار شام چەند کەناڵێکی پەیوەندیمان هەیە لە پێناو پاراستنی گەلی خۆمان لەو ناوچانە.
– ئێمە هانی چارەسەری ئاشتیانە دەدەین، دەمانەوێت کورد لەو ناوچانە بە ناسنامەی خۆیانەوە بمێننەوەو رۆڵیان هەبێت.
– ئێمە شەڕمان ناوێت، بەڵام ئەگەر هێرش بکرێتە سەرمان لە هەموو کات زیاتر ئامادەین.
– لەم بارودۆخە نوێیە ئاستی هەماهەنگیمان لەگەڵ هاوپەیمانی نێودەوڵەتی و روسیا زیاتر کردووە.
– لەگەڵ حکومەتی عێراق و هەموو لایەنەکانی پەیوەست بەم کێشەیە هەماهەنگیمان هەیە.
– تورکیاو گروپەکانی سەر بە تورکیا بە ئاشکرا هەڕەشەمان لێدەکەن.
– بڕوامان بە چارەسەی ئاشتیانە هەیە، بەڵام ئەگەر بوو بە شەڕ ئامادەین.
– دۆخی سوریا تەنیا بە رێگەچارەی سیاسی و دیالۆگ چارەسەر دەبێت.
– رێکەوتنەکانی پێشوو بۆیە سەریان نەدەگرت، چونکە ئێمە تیایدا بەشدارنەبووین.
– داعش خۆی رێکخستووەتەوەو کەوتووەتە جموجۆڵ.

لە جۆلانییەوە بۆ شەرعی.. ناوو شێوەی گۆڕاوە

ئەبو محەمەد جۆلانی کە چەند ساڵە وەک سەرکردەیەکی توندڕەوی سەر بە قاعیدەو نوسرە دەناسرێت، لەم ساڵانەی دواییدا دەیەوێت ئەو تێگەیشتنە لەسەر خۆی لاببات و وەک کەسێکی میانڕەو خۆی نمایش بکات.
جۆلانی ساڵی 2016 خۆی لە قاعیدە جیاکردەوەو ساڵێک دوای ئەوە دەستەی تەحریری شامی لەگەڵ چەند گروپێک پێکهێناو بووە سەرکردەیان، کاتێکیش ئیدلبیان گرتە دەست ئیدارەیەکی مەدەنیان پێکهێنا بۆ ئەوەی وای دەربخەن بە تەواوی لە قاعیدە دوور کەوتوونەتەوە، جۆلانی خۆیشی وردە وردە ریشە درێژەکەی کورد کردەوەو جلوبەرگە ئەفغانییەکەی گۆڕی.
تاکە شتێک کە لە رووکەشدا جۆلانی گرێ دەدەیەوە بە رێکخراوەکەی رابردووە، ناوەکەی بوو، دوێنێ ئەویشی گۆڕی.

دوێنێ ئەبو محەمەد جۆلانی لەسەر تێلیگرام پۆستێکی بڵاوکردەوە و تیایدا بۆ یەکەمجار ناوی راستەقینەی خۆی بەکارهێنا (ئەحمەد شەرع).

بەشار ئەسەد هاک کرابوو
دوێنێ شەو لە تۆڕە کۆمەڵایەتیەکان دەنگێک بە شێوەیەکی بەرفراوان بڵاوبووەوە کە تیادا گوایە بەشار ئەسەدە قسە دەکات و رایدەگەیەنێت وازی لە پۆستی سەرۆک کۆمار هێناوەو بەرپرسیارێتی هەموو دۆخەکەی هەڵگرتووە.
هەر زوو وەزارەتی راگەیاندنی سوریا ئەم دەنگەی رەتکردەوەو وتی بە زیرەکی دەستکرد دروستکراوە، تەنانەت وەزیری بەرگری سوریاش لە وتارەکەی دوێنێیدا وتی باوەڕ بەو زانیارییە ساختانە مەکەن