دانانی تابلۆکانی رێنمایی _ وێنە: دەزگای مین
بەکرێ وەریاندەگرێت
دەزگای مین داوای 44 لانکروزەر و پاترۆڵ دەکات
964+
ژووری هەواڵ
بەڕێوەبەرایەتی کاروباری مینی سلێمانی دەیەوێت 44 ئۆتۆمبێل بەکرێبگرێت و دەڵێت دابەشیاندەکات بەسەر تیمەکانی مین لە سنووری پارێزگاکانی هەولێر، سلێمانی، دهۆک، کەرکوک، هەڵەبجە و ئیدارەی راپەڕین.
ئەمڕۆ هەینی 13.9.2024، دەزگای مینی هەرێمی کوردستان رایگەیاند، پێویستیان بە بەکرێگرتنی 24 ئۆتۆمبێلی جۆری تۆیۆتا لاندکروزەر و نیسان پاترۆڵ هەیە داوا دەکات هەر کەس لەو جۆرە ئۆتۆمبێلانەی هەیە و خوازیارە بەکرێی بدات، سەردانیان بکات.
بۆ هەر ئۆتۆمبێلێک بڕی ملیۆنێک و 300 هەزار دینار دیاریکراوە، کاتی کارکردنیشیان هەفتەی پێنج رۆژە و لە کاتژمێر 5:00ـی بەیانی دەچنە سەر کار و نزیکی 12:00ـی پاش نیوەڕۆ کاریان کۆتاییدێت.
شۆفێری ئۆتۆمبێلەکان دەبێت خۆیان بەنزین بکڕن و کرێی مانگانەشیان لەلایەن حکومەتی هەرێمی کوردستان دابیندەکرێت، سەرۆکی دەزگای مین وای وت.
جەبار مستەفا، سەرۆکی دەزگای مین بە 964ـی راگەیاند، ماوەی پێنج رۆژ دیاریکراوە بۆ وەرگرتنی ئەو ئۆتۆمبێلانە و هەر کەس دەیەوێت دەتوانێت لەو پێنج رۆژەدا سەردانی بەڕێوەبەرایەتی گشتی کاروباری مینی سلێمانی بکات لە شەقامی بازنەیی مەلیک مەحموود – پردی کۆبانێ – تەلاری رۆیاڵ پاڵاس، بە مەبەستی وەرگرتنی فۆڕم.
لەدوای ئەو پێنج رۆژە، وادەی پێنج رۆژی دیکە دیاریدەکرێت بۆ گەڕاندنەوەی فۆڕمەکان.
