دیمهنێكی مۆنۆمێنتی ئەنفال له چه‌مچه‌ماڵ كه سۆشیاڵ میدیاى قایمقامییه‌ت بڵاویكردووهتهوه.
له‌دایكبوون و ئاگر و گرتنى راوچییه‌كان
چه‌مچه‌ماڵ به ده‌یان رووداوى جۆراوجۆر جه‌ژنى به‌ڕێكرد
964+
فه‌رهاد حه‌سه‌ن
قایمقامیەتى چەمچەماڵ ده‌ڵێت، چوار رۆژى جه‌ژنى قوربانیان به ده‌یان رووداوى جۆر به‌ڕێكردووه و له‌ناو ئه‌و رووداوانه‌ش نه‌خۆش كه‌وتن و له‌دایكبوونى منداڵ و ئاگركه‌وتنه‌وه‌و ده‌ستگیركردنى راوچیییه‌كان هه‌بووه.
قایمقامییه‌ت ئامارى رووداوه‌كانى بۆ هه‌ر چوار رۆژه‌كه‌ى جه‌ژن بڵاوكردووه‌ته‌وه كه فەرمانگە ئەمنی و خزمەتگوزارییەکانیان لە ئەرکدابوون ئه‌م رووداوانه‌یان تۆمار كردوون.
لە رووى ته‌ندروستییه‌وه، له ماوەی چوار رۆژی جەژن، دوو هه‌زار و 77 نەخۆش سەردانی نەخۆشخانە و مەڵبەندە تەندروستییەکانیان کردووە، 12 حاڵەتیان برینداربوون بووه بە ماتۆڕسکیل و چوار حاڵەتی برینداربوونى دیكه‌ش بە رووداوی هاتوچۆ بووە.
له‌م چوار رۆژه‌دا له سنوورى چه‌مچماڵ 20 منداڵ لەدایکبوونه 12 یان كچ و هه‌شت دانه‌شیان کوڕ بووه.
پێنج حاڵەتی ئاگرکەوتنەوەش لە پوش و پاوان هەبووه به‌ڵام ده‌ڵێت هیچ زیانێکی گیانی و مادی نەبووە.
له‌باره‌ى رووداوه‌كانى هاتوچۆشه‌وه، لەسەر ڕێگای سەرەکی چەمچەماڵ – تەکیەی کاکەمەند ئۆتۆمبیلێکی جۆری کراون (مەلیکە) وەرگەڕاو، به‌هۆیه‌وه دوو کەس گیانیان لەدەستداوە.
له بنكه‌كانى پۆلیسی ئه‌م قه‌زایه‌ش دوو رووداو تۆمار كراون، یه‌كه‌میان شەڕکردنێك لە ناحیەی سەنگاو روویداوە و چوارکەس دەستگیرکراون، رووداوێكی تەقەکردنیش لە ناحیەی تەکیەی کاکەمەند هەبووە کەسێک دەستگیرکراوە.
پۆلیسی دارستان و ژینگه‌ى چه‌مچه‌ماڵیش بە هاوکاری هێزەکانی ئاسایش چوار کەسیان بەتۆمەتى راوکردن دەستگیرکردووە و ده‌شڵێن، فەرمانی گرتن بۆ سێ کەسی دیکەش دەرچوه، به‌ڵام تاوه‌كو ئێستا ده‌ستگیر نه‌كراون.
كارى تیمكه‌كانى شارەوانیش له‌م چوار رۆژه‌دا بریتی بووه له پاککردنەوەى گەڕەک و شەقام و بازاڕەکان و به‌هۆیه‌وه دەیان تۆن خۆڵ و خاشاکیان کۆکردووەتەوە، هاوکات بەشی ئامێر و باخچەکانیش لە ئەرکدابوون بۆ ئاودانی باخچەکانی ناوشار .