خەڵک وایانزانیوە تەقینەوە بووە

بومەلەرزەیەکى بەهێز کەرکوکى هەژاند

964+

کاروان ساڵحى- کەرکوک

کەمێک پێش ئێستا، بومەلەرزەیەکى بەهێز کەرکوکى هەژاند و بەشێک لە خەڵکى هاتوونەتە دەرەوە.

کاروان ساڵحى پەیامنێرى 964 لە کەرکوک وتى،” کاتژمێر 6:39 خولەکى ئێوارە، بومەلەرزەیەکى بەهێز کەرکوکى هەژاند و لە گەڕەکەکانى شارەکە هەستى پێکراوە”.

وەک ئەوەى کاروان ساڵحى باسى دەکات، سەرەتا خەڵکەکە وایانزانیوە تەقینەوە بووە، چونکە بومەلەرزەکە دەنگێکى بەهێزى هاتووە و سێ بۆ چوار سانییە بەردەوام بووە.

نوێکراوەتەوە: 7:46 خولەک

964 سۆراغى کرد، تائێستا بە تەواوەتى یەکلایى نەبووەتەوە کە ئەو دەنگە بەهێزە بوومەلەرزە بووە یان تەقینەوە.

حەسەن عەلى، بەڕێوەبەرى کەشناسى و بومەلەرزەزانى کەرکوک بە 964ـى وت،” لە هیچ یەکێک لە ئامیرەکانى خوێندنەوەى بوومەلەرزە ئەو دەنگە بەهێزە نەخوێندراوەتەوە و ئەگەرى بەهێز ئەوەیە بومەلەرزە نەبووبێت”.

بە وتەى حەسەن عەلى، نەک خەڵکەکە هێزە ئەمنییەکانیش تائێستا نازانن چى روویداوە و ئەوانیش پەیوەندییان کەشناسى و بومەلەرزەزانییەوە کردووە و داوایان کردووە بزانن ئەوە دەنگى تەقینەوە بووە یان بومەلەرزە.

دەنگەکە زیاتر باکورى کەرکوکى گرتووەتەوە و لە گەڕەکەکانى، رەحیماوا و شۆریجە و ئیسکان و ئیمام قاسم و سەرچنار، هەستیپێکراوە.

ئێستا هێزە ئەمنییەکان دەستیان بە لێکۆڵینەوە کردووە و دەیانەوێت بزانن چى روویداوە.

پێداچوونەوە: وریا فەتاح