تیمێکی خەڵکی گوندەکە بۆ گەڕان بەدوای پیاوە ونبووەکەدا - وێنه: سۆشیاڵ میدیاى قەرەداغی نوێ
گەڕان کۆتایی هاتووە
مانگێکە پیاوە ونبووەکەی قەرەداغ نەدۆزراوەتەوە
964+
پێشەوا محەمەد
نزیکەی مانگێکە نەجمەدین محەمەدی تەمەن 74 ساڵ لە قەرەداغ ون بووە و تا ئێستا نەدۆزراوەتەوە، تیمە فەرمییەکان و کەسوکارەکەشی وازیان لە گەڕان هێناوە بەدوایدا.
ئەو پیاوە 1.5.2024 لە ماڵەوە و بە نیازی کردنی گژوگیای بەهارە چووەتە شاخ و لەوکاتەوە ون بووە، نزیکەی 20 رۆژ تیمەکانی فریاکەوتن گەڕاون، بەڵام هیچ ئاسەوارێکی پیاوەکەیان نەدۆزیوەتەوە.
رەئوف کەمال، قایمقامی قەزای قەرەداغ بە 964ـی راگەیاند، نازانن ئەو پیاوە چی لێهاتووە و هەموو هەوڵێکیان بۆ دۆزینەوەی داوە.
وتیشی، “بەهۆی ئەوەی وەرزی گەرما هاتووە و مەترسیی مار و حەشەری دیکە هەیە تیمەکان و کەسوکارەکەشی لە گەڕان وەستاون، بەڵام تیمی پۆلیسی دارستان بەردەوام هەرچییان بینی بەدوایدا دەچن”.
964 دەزانێت ئەو پیاوە ساڵی 2017ـش بۆ ماوەی سێ رۆژ ون بووە، دواتر لەنێوان دوو داردا دۆزیویانەتەوە و لە دارێک کەوتبووە خوارەوە و بریندار بووبوو.
“هیچ پێشبینییەکمان نییە ئەو پیاوە چی لێ هاتبێت، ئایا دوور و لە شوێنێکی عاسی کەوتبێت و وشک بووبێتەوە و لەبەر دوورییەکەی بۆنەکەی نەگەیشتبێت نازانین، بەڵام هەرچی ئەگەرێک بیرمان لێ کردووەتەوە پشکنینمان بۆ کردووە”، قایمقامی قەرەداغ وای وت.
