دیمەنی چەند ئاژەڵێک. وێنە:964
سزای بەدواوەیە
لە رانیە ئەوە نەما بە ئارەزووی خۆت ئاژەڵ رابگریت
964+
پێشەوا محەمەد
بۆ کۆتاییهێنان بە دیاردەى ئاژەڵدارى، ئیدارەی شاری رانیە ماوەی هەفتەیەک مۆڵەتی داوەتە ئەو کەسانەی لەناو شاردا ئاژەڵیان راگرتووە، قایمقامی قەزاکە دەڵێت، بە سەرپێچیی ژینگەیی هەژمار دەکرێت.
قایمقامیەت، شارەوانی و فەرمانگەی ژینگەی شارەکە بڕیارەکەیان داوە و لیژنەیەکی هاوبەشیشیان بۆ ئەو مەبەستە پێکهێناوە.
حسێن مەحمود، قایمقامی قەزای رانییە بە 964ـی راگەیاند، ئەوانەی هاتوونەتە شار دەبێت بڕیار بدەن لە شار بژین و ئەگەر کاری ئاژەڵداریش دەکەن پێویستە بگەڕێنەوە گوندەکان.
وتیشی،”ئاژەڵداری لەناو شاری رانییە زۆر بووە و جگە لە دیوە ناشارستانییەکەی زیان بە باخچەکان و ژینگە دەگەیەنن”.
بەپێی رێنماییەکانی ژینگەی شارەکە، لە دوای وادەکە ئاژەڵەکان دەستبەسەردا دەگرن و سزای مادیی خاوەنەکانیان دەدەن و دۆسیەی یاساییان لەسەر دەکەنەوە.
قایمقامی رانییە ئاماژەی بەوەش دا، ئەو هەفتەیە هەموو ئەوانە ئاگادار دەکرێنەوە ئاژەڵیان هەیە و پێویستە لە شار دووریان بخەنەوە.
