لۆگۆی یەکێتیی سەندیکاکانی کوردستان
هۆبەی تایبەتیان هەیە
ژنانی کرێکار دەتوانن لە لقی سلێمانی سەندیکای کرێکاران سکاڵا تۆمار بکەن
964+
پێشەوا محەمەد
لقی سلێمانیی سەندیکای کرێکارانی کوردستان هۆبەیەکی تایبەت بە تۆمارکردنی سکاڵایان بۆ ژنانی کرێکار هەیە و سەرۆکی لقەکە دەڵێت، ئەو هۆبەیە تەنیا لە سلێمانی هەیە.
بەپێی زانیارییەکانی سەندیکاکە، ئەو هۆبەیە بۆ ئەو ژنە کرێکارانەیە، کە نایانەوێت بچنە دادگا سکاڵا تۆمار بکەن و لەوێوە ئیشوکارەکانیان بۆ دەکرێت.
چالاک رەئوف، سەرۆکی لقی سلێمانیی سەندیکای کرێکاران بە 964ـی راگەیاند، هۆبەکە هاوکاریی ژنانی کرێکار دەکات تا سکاڵا لای ئەوان تۆمار بکەن و کارەکانیان بۆ بکەن و کەیسەکانیان بۆ ببەنە دادگا.
وتیشی، “بەشێک لە ژنانی کرێکار بەهۆی بارودۆخی کۆمەڵایەتییانەوە نایانەوێت بچنە دادگاکان، بۆیە هانا بۆ سەندیکاکە دەهێنن و ئەو هۆبەیەش لەسەر داواکاریی ئەو ژنانە دروستکراوە و کارە یاساییەکانیان بۆ دەکرێت”.
سەندیکای کرێکارانی کوردستان حەوت لقی هەیە و بە وتەی سەرۆکی لقی سلێمانیی سەندیکاکە، ئەو هۆبەیە تەنیا لە لقی سلێمانیدا هەیە.
“ژن هەیە گێچەڵی سێکسی پێکراوە، هەیە بەبێ هۆ دەرکراوە، هەیە پارەی خوراوە و کەیسی جۆراوجۆر هاتوونەتە ئەو هۆبەیە و کاریان بۆ دەکرێت”، چالاک رەئوف وای وت.
