بەشێک لەو نەمامانەی رووێندراون - وێنە: فەرمانگەی ژینگەی راپەڕین
رێژەی سەوزایی رانییە زیاد دەکات
هەزار نەمام لە دەربەندی رانیە رووێندران
964+
پێشەوا محەمەد
لە دەربەندی رانیە هەزار نەمام رووێندران و فەرمانگەی ژینگەی راپەڕین دەڵێت، رێژەی سەوزایی رانیە بەرز دەکاتەوە.
کارەکە لە لایەن دارستان و پاوانی رانیە، نەمامگەی شازاد سائیب و بەڕێوەبەرایەتیی گشتیی چاککردن و پاراستنی رێگاوبانی راپەڕین کراوە.
محەمەد کەریم، بەڕێوەبەری فەرمانگەی ژینگەی راپەڕین بە 964ـی راگەیاند، ئەو شوێنە لە چوارچێوەی سنووری دارستاندایە و دواتر خزمەت و پاراستنەکەی دەکەوێتە ئەستۆی دارستان و پاوانی راپەڕین، “لەگەڵ ئەوانیش بۆ ماوەی ساڵێک ئەو کۆمپانیایانەی لە رێگاوبان لە دەربەندی رانیە کار دەکەن یارمەتیی ئاودان و پاراستنیان دەدەن”.
وتیشی، “ئەو نەمامانە سروشت و دیمەنێکی جوان بە دەربەندی رانیە دەبەخشن و دەشبنە هۆکاری زۆربوونی رێژەی سەوزایی رانیە و بۆ 9% یان 10% بەرزی دەکاتەوە”.
“پێموابێ هەر هەزار نەمامەکە رووێندراوە، ئەگەر تەواویش نەبووبێت ئەم چەند رۆژە تەواوی دەکەن”، ئەوەش قسەی محەمەد کەریمە.
