لە رێگەی مۆبایلەکەتەوە سکاڵا بکە
دەستەی مافی مرۆڤ سکاڵا ئۆنلاینی راگەیاند
964+
پێشەوا محەمەد
دەستەی سەربەخۆی مافی مرۆڤی هەرێم فۆڕمی ئۆنلاینی تۆمارکردنی سکاڵای راگەیاند و سەرۆکی دەستەکە دەڵێت، لەمەودوا هەرکەسێک لە هەرشوێنێک سەرپێچی بینی، دەتوانێت سکاڵا بکات.
ئێستا فۆڕمەکە لەسەر ماڵپەڕی فەرمی دەستەکە بەردەستە و دەتواندرێت پڕبکرێتەوە.
مونا یاقوو، سەرۆکی دەستەی مافی مرۆڤ بە 964ـی راگەیاند، سکاڵای ئۆنلاین کارئاسانییەکی زۆر دەکات بۆ تۆمارکردنی سکاڵا و پێویست بە جوڵە و چوون بۆ هیچ نووسینگە و دامەزراوەیەکی ئەوان ناکات.
وتیشی، “هەندێک کەس نەیاندەزانی بێنە نووسینگەکانمان لە شار و شارۆچکەکان، هەبوو خاوەن پێداویستی تایبەت بوو، هەبوو سکاڵای هەبوو، بەڵام ئێمە لەو شار و شارۆچکەیە نووسینگەمان نەبووە، ئێستا هەر کەسێک لە هەرشوێنێک بێت، دەتوانێت لە مۆبایلەکەیەوە سکاڵا تۆمار بکات”.
دەستەی مافی مرۆڤ 10 نووسینگەی لە شار و شارۆچکەکانی هەرێمدا هەیە.
“دوای تۆمارکردنی سکاڵاکە ئێمە لای خۆمانەوە سەیری دەکەین و بەدواداچوونی بۆ دەکەین”، سەرۆکی دەستەکە وادەڵێت.
