964+
خەریکە دەبێت بەکەلاوە
12 ساڵە نەخۆشخانە 291 قەرەوێڵەیەکەی رانییە لە چاوەڕوانى تەواو بوندایە
964+
ئەحمەد مستەفا
12 ساڵە دانیشتوانى سنوورى راپەڕین، لە چاوەڕوانیدان بۆ تەواوبونى نەخۆشخانەى 291 قەرەوێڵەیى رانیە، بەڵام هەشت ساڵە کارکردن تێیدا وەستێنراوە و دارى نەخراوەتە سەر بەرد.
نەخۆشخانەکە ساڵى 2012 بەردى بناغەى دانراوە و بریار بوو لەماوەى دوو ساڵدا تەواو بکرێت، هەرچەندە تا ساڵى 2015 ئیشکردن تێیدا بەردەوام بوو و توانرا بیناى نەخۆشخانەکە تەواو بکرێت، بەڵام ماوەى هەشت ساڵە ئیشکردن تێیدا وەستێنراوە.
دکتۆر دیار ئیبراهیم، بەرێوەبەرى گشتى تەندروستى راپەڕین قسەى بۆ 964 کردووە و دەڵێت، “وەزارەتى ئاوەدانکردنەوە لایەنى جێبەجێکارى پڕۆژەکەیە و وەک تەندروستى هیچ بەرپرسیاریەتییەک لەسەر شانى ئێمە نیە، دەبێت وەزارەتى ئاوەدانکردنەوە ئەو پڕۆژەیە تەواو بکات، ئێمە تەنیا لایەنى سودمەندین”.
ئەو باسى لەوەکرد، تەواو بوونى ئەو پڕۆژەیە بۆ رانیە و ئیدارەى راپەڕین گرنگ و پێویستە، چونکە لە رانیە بڵاوییەک هەیە لەرووى کەرتى تەندروستییەوە، بەڵام ئەگەر نەخۆشخانەکە تەواو بکرێت هەمووان لە شوێنێک کۆدەکاتەوە، ئەوکات ئەرکى نەخۆشان و پزیشکانیش ئاسانتر دەبێت.
بەپێى قسەى دکتۆر دیار، لەرووى بیناوە، پڕۆژەکە نزیکەى 90%ى کارەکانى تەواو بووە، بەڵام هیچ پێویستییەکى پزیشکى بۆ نەکڕدراوە.
964 زانیویەتى، بەهۆى وەستانى کارکردن لە پڕۆژەکە بۆ ماوەیەکى زۆر، بەشێک لەو کارانەى بۆ پڕۆژەکەکراوە، خراپ بوون و نەخۆشخانەکە بووە بە شوێنى کۆبونەوەى باڵندەکان.
هاوکات، تۆڕى پاراستنى تەندروستى لە بەیاننامەیەکدا دەڵێت: تەواونەکردنی ئەم پرۆژە گرنگ و ستراتیژییە ژیانی هەزاران هاوڵاتی دەڤەری راپەڕین و دەوروبەری دەخاتە مەترسییەوە، هاوکات خستنەگەڕی نەخۆشخانەیەکی گەورەی 291 قەرەوێڵەیی هەلی کار بۆ سەدان تەندروستکاری بێکار دابیندەکات و دەرئەنجام هاوکار دەبێ بۆ بوژانەوەی ئابوری ناوچەکە.
لە رۆژی 1.5.2012، بەردى بناغەى پڕۆژەکە دانراوە گوژمەى تەرخانکراوى پڕۆژەکە 107 ملیۆن ملیار دینارە.
