ناوبازاڕی قەزای بازیان - وێنە: 964
964 وەڵامی وەرگرتووە
هۆکاری زەردی رەنگی ئاوی بازیان چییە؟
964+
پێشەوا محەمەد
ماوەی چەند رۆژێکە ئاوی نیشتیمانی دانیشتوانی قەزای بازیان زەرد بووە و 964 بەدواداچوونی بۆ ئەو بابەتە کردووە.
جەلال محەمەد، دانیشتووی شارۆچکەی بازیانە و بە پێی قسەکانی کە بۆ 964ـی کرد، جگە لە زەردیی رەنگی ئاوەکە هاوکات بۆنی ناخۆشیشی لێدێت و ناتوانن بۆ خواردنەوە بەکاری بهێنن.
بەڕێوەبەرایەتی ئاوی دەوروبەری سلێمانی دڵنیایی دەدات هیچ کێشەیەک لە ئاوەکەدا نییە و پیس نەبووە و پەیوەندی بە وەرز گۆڕانەوە هەیە.
سیروان جەمال، بەڕێوەبەری ئاوی دەوروبەری سلێمانی بە 964ـی وت، “لە وەرزی پاییزاندا ئاوی دوکان کەم دەکات و خەزانەکانیش بە هەمان شێوە و تێکەڵی قەوزە دەبێت”.
وتیشی، “لەو کاتانەدا چڕیی ئاوەکە زۆر دەبێت و ئاوەکە هەر بەو جۆرە دەپاڵێورێت، بەڵام هیچ کێشەیەکی پیسبوون و مەترسی دروستکردنی نەخۆشیی نییە”.
